کتابی حوالہ:
پیدائش 6: 5-22؛  7:13– 8:3؛ 8: 15-20؛ 9: 13-15

ویڈیو کا خلاصہ:

نوح ایک ایسا شخص تھا جو خُدا سے اپنی وفاداری کے لیے جانا جاتا تھا۔ نوح نے خُدا کے ہر حکم پر عمل کیا اور خود کو بدی  سے بچائے رکھا۔ اُس کی وفاداری کے باعث، خُدا نے فیصلہ کیا کہ وہ نوح کو نقصان سے بچائے گا۔ خُدا نے نوح کو ہدایت دی کہ وہ ایک بڑے طوفان کی تیاری کرے اور ایک بہت بڑی کشتی بنائے۔

جب کشتی مکمل ہو گئی، تو خُدا نے نوح سے کہا کہ وہ اپنے خاندان اور جانوروں کو اس میں سوار کرے۔ اُسے حکم دیا گیا کہ وہ طوفان سے بچنے کے لیے کشتی میں رہے اور زمین کے دوبارہ خشک ہونے تک انتظار کرے۔ نوح نے ویسا ہی کیا جیسا خُدا نے اُسے فرمایا تھا۔

بارش شروع ہوئی اور چالیس دن اور رات تک مسلسل ہوتی رہی۔ نوح کا خاندان کئی مہینوں تک کشتی میں محفوظ رہا، جب تک کہ پانی اتر نہ گیا اور زمین دوبارہ خشک نہ ہو گئی۔

کشتی سے باہر آنے کے بعد، نوح اور اُس کے خاندان نے خُدا کی عبادت کی کیونکہ اس نے ان کی حفاظت کی تھی ۔ خُدا نے نوح اور اُس کے خاندان سے وعدہ کیا کہ وہ دوبارہ کبھی زمین کو طوفان سے تباہ نہیں کرے گا۔ اس وعدے کی نشانی کے طور پر، خُدا نے آسمان میں قوسِ قزح رکھی۔ خُدا نے نوح اور اُس کے خاندان کو اس لیے بچایا کیونکہ وہ خُدا کے وفادار تھے۔

ویڈیو کے بارے میں:

چھوٹا اونن آسمان میں قوسِ قزح دیکھ کر ڈر جاتا ہے کیونکہ اُس نے سنا ہے کہ یہ کسی خوفناک چیز کی نشانی ہے۔ اُس کا چچا سام اُسے نوح کی کہانی سنا کر سمجھاتا ہے کہ درحقیقت قوسِ قزح خُدا کی قدرت اور اُس کے تمام انسانوں سے محبت بھرے وعدے کی نشانی ہے۔

نوح کی کہانی کو صحیح طور پر سمجھنے کا بہترین طریقہ یہ ہے کہ اُسے پیدائش 1 سے 9 کے سیاق و سباق میں دیکھا جائے۔ پیدائش 1 سے 9 ہمیں بتاتا ہے کہ خُدا نے دنیا اور اُس میں موجود ہر چیز کو تخلیق کیا۔ خُدا نے انسانوں کو اپنے ساتھ ایک خاص تعلق کے لیے پیدا کیا تھا۔ (پیدائش 1، 2) مگر انسان گناہ کی آزمائش میں آ گئے، اور یہ گناہ خُدا کے ساتھ اُن کے تعلق میں رکاوٹ بن گیا (پیدائش 3)۔ اگرچہ خُدا اور انسان کے درمیان تعلق بدل گیا، پھر بھی خُدا نے اپنے لوگوں کی حفاظت جاری رکھی۔

وقت کے ساتھ، دنیا میں گناہ اور بدی اس قدر بڑھ گئی کہ خُدا نے فیصلہ کیا کہ وہ زمین کو طوفان سے صاف کرے گا اور ایک نئی شروعات کرے گا۔ (پیدائش 5–9) خُدا کو ایک راستباز شخص نوح اور اُس کا خاندان ملا۔ بڑی رحمت کے ساتھ، خدا نے نوح اور اس کے خاندان کو طوفان سے محفوظ رکھا اور انہیں کشتی بنانے کا حکم دیا۔

جب لوگ کشتی سے باہر نکلے، تو خُدا نے آسمان میں ایک قوسِ قزح رکھی اور نوح اور اُس کے خاندان کے ساتھ ایک عہد (یا وعدہ) کیا۔ خُدا نے لوگوں سے فرمایا  "پھلو اور بڑھو اور زمین کو بھر دو" (پیدائش 9:1)، اور وعدہ کیا کہ وہ دوبارہ کبھی پانی سے تمام زندگی کو تباہ نہیں کرے گا (پیدائش 9:8)۔ جب ہم قوس قزح دیکھیں، تو یاد رکھ سکتے ہیں کہ خدا نے نوح اور اس کے خاندان کو محفوظ رکھا اور وعدہ کیا کہ وہ ہمیں بھی محفوظ رکھے گا۔
 

سوچنے کے لیے سوالات:

خُدا نے پوری زمین پر سیلاب لانے کا فیصلہ کیوں کیا؟

نوح نے خُدا کے لیے اپنی وفاداری کیسے ظاہر کی؟

خُدا نے قوسِ قزح آسمان میں کیوں رکھی؟

آپ، خُدا کے لیے اپنی وفاداری کیسے ظاہر کر سکتے ہیں؟